ຂ່າວ: ສະຫມານ

   ບໍລິສັດ ເອັກສະເປຣດ ຟູດກຣຸບ (ລາວ) ຈຳກັດມີຄວາມຫມັ້ນໃຈສິນຄ້າພິດຊາຄອມປານີ ແລະ ກາແລັມສະເວັນເຊັນ ຈະໄດ້ຮັບ ການຕອບຮັບດີຈາກລູກຄ້າໃນລາວ ຫລັງເປີດສູນບໍລິການທົດລອງຕະຫລາດເບື້ອງຕົ້ນ.

   ທ່ານ ນາງ ເພັດສະຫວັນ ຫອມວັນນະສີ ຜູ້ຈັດການຝ່າຍປະຕິບັດງານບໍລິສັດ ເອັກສະເປຣດສ໌ຟູດ ກຣຸບ (ລາວ)ຈຳກັດເປີດເຜີຍ ວ່າ: ເພື່ອຕອບສະຫນອງ ແລະ ບໍລິການດ້ານພິດຊາ ແລະ ກາແລັມໃຫ້ແກ່ລູກຄ້າຊາວລາວ. ທີ່ຜ່ານມາເຫັນວ່າມີຄົນລາວ ສ່ວນໃຫຍ່ ທີ່ເດີນທາງໄປທ່ອງທ່ຽວປະເທດໄທຈະມັກເຂົ້າໄປຊື້ສິນຄ້າກໍ່ຄືພິດຊາຄອມປານີ ແລະ ກາແລັມສະເວັນເຊັນເປັນຈຳນວນຫລວງຫລາຍ, ຈາກຈຸດນີ້ບໍລິສັດເອັກສະເປຣດສ໌ ຟູດກຣຸບ (ລາວ) ຈຳກັດ ຈິ່ງຕັດສິນໃຈຊື້ລິຂະສິດແຟຣນ ຊາຍສ໌ ທີ່ມີຊື່ສຽງລະດັບສາກົນກໍ່ຄືເດິພິດ ຊາຄອມປານີ ແລະ ສະເວັນເຊັນຈາກບໍລິສັດເດິໄມເນີຈີກຣຸບ ຈຳກັດມະຫາຊົນແຫ່ງປະເທດໄທ ເພື່ອສ້າງຮ້ານແລ້ວເປີດບໍລິການຂາຍ ພິດຊາຄອມປານີ ແລະ ກາແລັມສະເວັນເຊັນທີ່ ສປປ ລາວ.

   ການລົງທຶນຄັ້ງນີ້ຂອງບໍລິສັດເອັກສະເປຣດສ໌ ຟູດກຣຸບ (ລາວ) ຈຳກັດ ໃຊ້ງົບປະມານເຖິງ 5 ແສນໂດລາສະຫະລັດເຂົ້າໃນການ ປຸກສ້າງຫ້ອງປຸງແຕ່ງອາຫານ ແລະ ຫ້ອງບໍລິການລູກຄ້າໃຫ້ມີມາດຕະຖານຂອງພິດຊາຄອມປານີ ແລະ ສະເວັນເຊັນ ເຊິ່ງມີລະບົບ ຫ້ອງແອທີ່ສາມາດຮອງຮັບລູກຄ້າໄດ້ເຖິງ 180 ຄົນ.

   ແນວໃດກໍ່ຕາມທ່ານນາງ ເພັດສະຫວັນ ຫອມວັນນະສີ ກ່າວຕື່ມ ອີກວ່າ: ຈາກການເປີດບໍລິການເບື້ອງຕົ້ນນີ້ຜູ້ປະກອບການບໍ່ໄດ້ ຄາດຫວັງຫຍັງຫລາຍພຽງແຕ່ຢາກໃຫ້ປະຊາຊົນລາວກໍ່ຄືລູກຄ້າຮູ້ຈັກຮ້ານເດິພິດຊາຄອມປານີ ແລະສະເວັນເຊັນຫລາຍຂຶ້ນເຊິ່ງສະຖານ ທີ່ດັ່ງກ່າວຕັ້ງຢູ່ຖະຫນົນສາມແສນໄທ ຂ້າງຫໍວັດທະນະທຳແຫ່ງຊາດ ນະຄອນຫລວງວຽງຈັນ ເຊິ່ງການບໍລິການເລີ່ມແຕ່ 10:00 ໂມງ ຈົນເຖິງ 22:00 ໂມງ ທຸກໆວັນ ໂດຍມີລາຍການອາຫານໃຫ້ເລືອກຫລາຍກວ່າ 50 ຊະນິດ. ນອກຈາກນີ້ ພວກເຮົາກໍ່ຈະເນັ້ນການ ບໍລິການເປັນຫລັກເພື່ອສ້າງຄວາມພໍໃຈໃຫ້ແກ່ລູກຄ້າກໍ່ຄືດຶງດູດລູກຄ້າໃຫ້ມາຊົມໃຊ້ບໍລິການເພີ່ມຂຶ້ນໃນແຕ່ລະວັນ.

   ເດິພິດຊາຄອມປານີ ແລະ ກາແລັມສະເວັນເຊັນ ເປັນສິນຄ້າທີ່ມີຊື່ສຽງລະດັບສາກົນ ເຊິ່ງມີຕະຫລາດໃນຫລາຍປະເທດຍອມຮັບ ເຮັດໃຫ້ການບໍລິການ ຫລື ຍອດຂາຍເພີ່ມຂຶ້ນໃນແຕ່ລະປີ ໂດຍສະເພາະແມ່ນສະຫະລັດອະເມຣິກາ, ໄທ ແລະ ປະເທດອື່ນໆ. ນອກ ຈາກນີ້ຍັງມີແຜນຈະຂະຫຍາຍຕະຫລາດໄປຕື່ມອີກໃນຂົງເຂດອາຊີ... ແລະ ຄັ້ງນີ້ເປັນການເປີດຕະຫລາດຢູ່ລາວ ເຊິ່ງຈະສາມາດຕອບ ສະຫນອງ ແລະ ຮອງຮັບການທ່ອງທ່ຽວຫລາຍພໍສົມຄວນ.