Anonymous wrote:

---

ການ​ແຂ່ງຂັນ​ກິລາ​ລີກ ລະດູ​ການ 2010-2011 ພວກ​ເຮົາ​ຈະ​ໄດ້​ເຫັນ​ປະ​ກົດ​ການ​ໃໝ່ ຫຼາຍສະ​ໂມສອນ ​ຕ່າງ​ກໍ​ໄດ້ນໍາ​ເອົາ​ນັກ​ເຕະ​ຕ່າງ​ຊາດ​ ເຂົ້າ​ຮ່ວມທິມຂອງ​ຕົນ​ເອງ ​ເພື່ອ​ລຸຍ​ລາວລີກ​ ໃນ​ທ້າຍ​ເດືອນ​ກຸມພາ ທີ່​ຈະ​ເປີດສາກ​ຂຶ້ນ​ນີ້.

ວັນ​ທີ 11 ກຸມພາ​ຜ່ານ​ມາ​ນີ້ ທີ່​ສູນ​ຝຶກ​ກີລາ​ບານ​ເຕະ​ແຫ່ງ​ຊາດ ຫ້ວຍ​ຫົງ​ ໄດ້​ຈັດ​ກອງ​ປະຊຸມ​ ດ້ານ​ເຕັກນິກ​ວິຊາ​ການ​ ແຂ່ງຂັນ​ລາວ​ລີກ ລະດັບ ກ ຂຶ້ນ ​ໂດຍ​ທ່ານ ພູ​ວັນ ວົງ​ສຸດ​ທີ ປະທານ​ສະຫະພັນ​ບານ​ເຕະ​ແຫ່ງ​ຊາດ​ລາວ ​ເປັນ​ປະ​ທານ ​ມີ​ບັນດາ​ຕົວ​ແທນ​ຈາກ 8 ສະ​ໂມ​ສອນ​ເຂົ້າ​ຮ່ວມ ການ​ແຂ່ງຂັນ​ໄດ້ກໍານົດ ​ແລະ ດັດ​ແກ້​ກົດ​ລະບຽບ​ ຂອງ​ການ​ຈັດການ​ແຂ່ງຂັນ​ ໃຫ້​ແທດ​ເໝາະ​ກັບ​ສະພາບ​ຕົວ​ຈິງ ​ເຊິ່ງ​ໃນ​ລະດູ​ການນີ້ ​ທາງ​ສະຫະພັນ​ເຕະບານ​ແຫ່ງ​ຊາດ​ລາວ​ ໄດ້​ໄຂ​ໂອກາດ​ໃຫ້​ສະ​ໂມ​ສອນ​ ສາມາດ​ດຶງ​ເອົາ​ນັກ​ເຕະ​ຕ່າງ​ຊາດ ​ເຂົ້າ​ຮ່ວມ​ທີ​ມ​ໄດ້ 3 ຄົນ ​ແລະ ​ໃນ​ແຕ່​ລະ​ນັດ​ ໃຫ້​ລົງ​ໄດ້​ບໍ່​ເກີນ 2 ຄົນ​ເທົ່າ​ນັ້ນ ​ແລະ ບໍ່​ອະນຸຍາດ​ໃຫ້​ນັກ​ກິລາ​ຕ່າງ​ດ້າວ​ ທີ່​ມາ​ທ່ຽວລາວ ​ລົງ​ຮ່ວມ​ຫຼີ້ນ​ໃຫ້​ແກ່​ສະ​ໂມ​ສອນ​ຕ່າງໆ​ໄດ້ ພິ​ເສດ​ລະດູ​ການ​ນີ້ ສະຫະພັນ​ໄດ້​ເພີ່ມ​ເງິນ​ລາງວັນ​ຂຶ້ນ​ຫຼາ​ຍກ່ວາ​ຄັ້ງ​ຜ່ານ​ມາ ຊະນະ​ເລີດ​ ຈະ​ໄດ້​ຮັບ​ຂັນ 1 ໜ່ວຍ ​ເງິນສົດ 30 ລ້ານ​ກີບ ອັນ​ດັບ 2 ​ໄດ້​ຮັບ​ເງິນສົດ 20 ​ລ້ານ​ກີບ ອັນດັບ 3 ​ໄດ້​ຮັບ​ເງິນສົດ 10 ລ້ານ​ກີບ ສ່ວນ​ທີ​ມທີ່​​ເຂົ້າ​ຮ່ວມ​ການ​ແຂ່ງຂັນ ​ທຸກ​ທິມຈະ​ໄດ້​ຮັບ​ເງິນ​ບໍາລຸງ​ທິມ 10 ລ້ານກີບ ສ່ວນ​ຊະນະ​ເລີດ​ລະດັບ ຂ ​ໄດ້​ຮັບ​ຂັນ​​ເງິນ 1 ໜ່ວຍ ພ້ອມ​​​ເງິນສົດ 10 ລ້ານ​ກີບ ອັນ​ດັບ 2 ​ໄດ້​ຮັບ​ເງິນສົດ 8 ລ້ານ​ກີບ ອັບ​ດັບ 3 ​ໄດ້ຮັບ​ເງິນສົດ 6 ລ້ານ​ກີບ.

ໂອກາດ​ນີ້ ທ່ານ ພູ​ວັນ ວົງ​ສຸ​ດທິ ​ໃຫ້​ສໍາພາດວ່າ ນັບ​ແຕ່​ການ​ແຂ່ງ​ຂັນ​ໃນ​ຊີ​ເກ​ມ ຄັ້ງ​ທີ 25 ຜ່ານ​ມາ ​ເຫັນ​ວ່າ​ວົງ​ການ​​ເຕະບານ​ລາວ ໄດ້​ຮັບ​ຄວາມ​ນິຍົມ​ຈາກ​ສັງຄົມຫຼາຍ​ຂຶ້ນ ຍ້ອນ​ວ່າ​ນັກກີລາ​ ມີ​ການພັ​ດທະ​ນາ​ຫຼາຍ​ຂຶ້ນ​ ອີກລະດັບ​ໜຶ່ງ ສໍາລັບ​ການ​ແຂ່ງຂັນ​ປະຈໍາປີ ລາວ​ລີກ 1 ​ແລະ ລາວ ລີ ກ 2 ກໍ​ເປັນ​ອີກວີ​ທີ​ໜຶ່ງ​ ທີ່​ເປັນ​ການ​ພັດທະນາ​ ນັກກີລາ​ບານ​ເຕະ​ລາວ ​​ໃຫ້​ມີ​ຄວາມ​ສາມາດ​ດີ​ຂຶ້ນ ທັງ​ນີ້​ກໍ​ຍ້ອນ​ວ່າ ​ເມື່ອ​ນັກ​ກິລາ​ໄດ້​ເຄື່ອນ​ໄຫວ​ແຂ່ງຂັນ ​ຢ່າ​ງຕໍ​ເນື່ອງ ມັນ​ຈະ​ຊຸກຍູ້​ໃຫ້​ນັກກີລາ ​ມີ​ການ​ພັດທະນາ​ຄວາມ​ສາມາດ​ຂອງ​ຕົນ ​ໃຫ້​ດີ​ຂຶ້ນ​ກ່ວາ​ເກົ່າ ພ້ອມ​ນີ້​ ກໍ​ຂໍ​ຮຽກຮ້ອງ​ມາ​ຍັງ ​ສະ​ໂມສອນ​ກີລາ​ຕ່າງໆ​ ຈົ່ງນັບຖື​ກົດລະບຽບ​ ທີ່​ທາງ​ສະຫະພັນ​ວາງ​ອອກ ​ຕະຫຼອດ​ການ​ແຂ່ງຂັນ.​

ໃນ​ກອງ​ປະຊຸມ ​ຍັງ​ໄດ້​ແຈ້ງກົດ​ລະບຽບ​ຂອງ​ການ​ແຂ່ງຂັນ ​ເປັນ​ຕົ້ນ​ແມ່ນ​ ບັນດາ​ສະ​ໂມ​ສອນ ​ມີ​ສິດ​ສົ່ງ​ລາຍ​ຊື່​ນັກ​ກິລາ​ຂອງ​ຕົນ ​ຄັ້ງ​ທໍາອິດ ​ໄດ້​ຈໍານວນ 25 ຄົນ ກ່ອນ​ການ​ແຂ່ງຂັນ 45 ວັນ ​ແລ້ວ​ໃຫ້​ແຈ້ງລາຍ​ຊື່​ສຸດ​ທ້າຍ ​ຈໍານວນ 20 ຄົນ​ ກ່ອນ​ການ​ແຂ່ງຂັນ 15 ວັນ ​ແລະ ກົດ​ລະບຽບອື່ນໆ​ຕື່ມ​ອີກ ​ໃນ​ເບື້ອງຕົ້ນ ຕາມ​ການ​ຕົກລົງ​ແມ່ນ ຈະ​ມີ​ທີ​ມມາ​ຮ່ວມ​ ແຂ່ງຂັນ​ລາວ​ລີກ 1 ຈໍານວນ 1​0 ທິມແຕ່​ສະ​ໂມ​ສອນກົມ​ພາສີ ​ແລະ ມູນ​​ເດີ​ໄນ ຂໍ​ຖອນ ຈຶ່ງ​ເຫຼື​ອ 8 ທີ​ມ ປະກອບ​ມີ ກະຊວງ​ປ້ອງ​ກັນ​ປະ​ເທດ ກະຊວງ​ໂຍທາ​ທິການ ​ແລະ ຂົນ​ສົ່ງນະຄອນຫຼວງ ກະ​ຊວງ​ປ້ອງກັນຄວາມ​ສະຫງົບ ສະ​ໂມ​ສອນ​ເອສຕຣາ ສະໂມ​ສອນ​ທະນາຄານ ສະ​ໂມ​ສອນ​ວິທະຍາ​ໄລລາ​ວ-ອາ​ເມ​ລິ​ກາ ​ແລະ ສະ​ໂມ​ສອນ​ຫາຍ​ໂສກ ກອບ​ປີ້​ເຊັນ​ເຕີ.

---