ປະຈຸບັນ ສິນຄ້າໃນທ້ອງຕະຫລາດມີຫລາຍປະເພດ, ຫລາຍສີສັນ, ແຕກຕ່າງກັນທາງດ້ານ ຄຸນນະພາບ ແລະ ລາຄາ. ສ່ວນໃຫຍ່ສິນຄ້າທີ່ນຳມາຈາກຕ່າງປະເທດແມ່ນມີລາຄາສູງ ແຕ່ກໍ ຖືກນຳໃຊ້ຫລາຍເຂົ້າໃນຊີວິດປະຈຳວັນຂອງຄົນໃນສັງຄົມລາວ,ເຮັດໃຫ້ການຜະລິດສິນຄ້າພາຍ ໃນບໍ່ມີການຂະຫຍາຍຕົວເທົ່າທີ່ຄວນ ເຊິ່ງເປັນຜົນກະທົບຢ່າງໃຫຍ່ຫລວງ ທາງດ້ານເສດຖະ ກິດ, ຈາກປະກົດການດັ່ງກ່າວ ມັນໄດ້ຮຽກຮ້ອງໃຫ້ມີການຊົມໃຊ້ສິນຄ້າພາຍໃນ ໃຫ້ຫລາຍຂຶ້ນ ກວ່າເກົ່າ ເພື່ອໃຫ້ເສດຖະກິດມີການຂະຫຍາຍຕົວ ກ້າວໄປສູ່ລະດັບສູງຍິ່ງຂຶ້ນ. ເຊັ່ນດຽວກັບ ທ່ານນາງ ວົງກົດ ສີພັກດີ, ບ້ານສະພານທອງໃຕ້ເມືອງສີສັດຕະນາກ ນະຄອນຫລວງວຽງຈັນ ເຮັດອາຊີບຄ້າຂາຍ ຮັບຊື້ເຈ້ຍເສດລົງມືທຳການຜະລິດມາ ໄດ້ 3 ປີແລ້ວ ເຊິ່ງມີໂຮງງານຕັ້ງ ຢູ່ບ້ານທ່າມ່ວງເມືອງຫາດຊາຍຟອງ ນະຄອນຫລວງວຽງຈັນ ແຕ່ກ່ອນລາວເປັນພະນັກງານຢູ່ ບໍລິສັດແຫ່ງຫນຶ່ງ, ຫລັງຈາກເປັນພະນັກງານມາໄດ້ 10 ປີ ຍ້ອນຢາກມີການຜະລິດເປັນຂອງ ຕົນເອງ ລາວຈິ່ງຫັນປ່ຽນທິດທາງໃນການຄອງຊີບຈາກທີ່ມີເງິນເດືອນກາຍມາເປັນເງິນມື້ ຮັບຊື້ ເຈ້ຍເສດ ແລ້ວສົ່ງຂາຍຕາມໂຮງງານຕ່າງໆ.

ເມື່ອມີເງື່ອນໄຂໃນໄລຍະຕໍ່ມາຈິ່ງສ້າງໂຮງງານ ຜະລິດເຈ້ຍ ເປັນຂອງຕົນເອງຂຶ້ນໃນປີ 2006 ເຊິ່ງແມ່ນສາມີເປັນຜູ້ຈັດການຢູ່ໂຮງງານຜະລິດ ສ່ວນເຈ້ຍທີ່ຮັບຊື້ເຂົ້າມາສ່ວນຫລາຍ ແມ່ນເຈ້ຍແກັດ ກິໂລກລາມລະ 90 ກີບ, ສະເພາະເຈ້ຍ ແກັດສົ່ງໃຫ້ບໍລິສັດໄທ ກິໂລລະ 13 ບາດ(ສະກຸນເງິນໄທ), ເຈ້ຍເອກະສານ ແລະ ເຈ້ຍເສດ ຈາກໂຮງພິມຕ່າງໆ ກິໂລກລາມລະ 800-1.200 ກີບ ເຈ້ຍດັ່ງກ່າວຈະນຳໄປຜະລິດເປັນເຈ້ຍ ອະນາໄມກາດອກມະລິດັ່ງທີ່ເຮົາພົບເຫັນຕາມທ້ອງຕະຫລາດ ແລະເຈ້ຍເຟືອງສະເລ່ຍເຈ້ຍທັງ ຫມົດທີ່ສາມາດປ້ອນເຂົ້າໂຮງງານມື້ລະ 1 ໂຕນ ລາຍໄດ້ເດືອນຫນຶ່ງ ປະມານ 50-60 ລ້ານ ກີບ ສາມາດເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກວ່າເກົ່າ.

   ທ່ານນາງ ວົງກົດ ສີພັກດີ ຍັງໄດ້ກ່າວອີກວ່າ: ມາເຖິງປະຈຸບັນ ບໍລິສັດກໍໄດ້ດຳເນີນທຸລະ ກິດມາໄດ້ 3 ປີແລ້ວ ແຕ່ຄຽງຂ້າງຂໍ້ດີກໍຍັງມີຂໍ້ຫຍຸ້ງຍາກຫລາຍດ້ານເຊັ່ນ: ຕະຫລາດສົ່ງອອກ ຍັງມີນ້ອຍ, ແຮງງານການຜະລິດຍັງຕ່ຳ, ບໍ່ຄ່ອຍໄດ້ຮັບຄວາມນິຍົມຊົມໃຊ້ຫລາຍຈາກພາຍໃນ ສະນັ້ນ ຈິ່ງຢາກຮຽກຮ້ອງມາຍັງຜູ້ຊົມໃຊ້ ໃຫ້ຊ່ວຍກັນຫັນມາໃຊ້ຜະລິດຕະພັນຈາກສີມືຄົນລາວ ໃຫ້ຫລາຍຂຶ້ນ ແນ່ນອນເສດຖະກິດຂອງເຮົາກໍຈະດີຂຶ້ນເຊັ່ນກັນ ນອກຈາກນີ້ ໃນອະນາຄົດຈະ ຜະລິດເຈ້ຍຂາວ ສົ່ງໃຫ້ໂຮງພິມພາຍໃນນະຄອນຫລວງ ແລະກໍມີແຜນການປັບປຸງທາງດ້ານ ຄຸນນະພາບ ແລະ ລາຄາໃຫ້ຖືກອົກຖືກໃຈຕະຫລາດພາຍໃນອີກດ້ວຍ.

Source: ecom