ແຫລ່ງຂ່າວຈາກກົມການຂ່າວຕ່າງປະເທດ ກະຊວງການຕ່າງປະເທດໃຫ້ຮູ້ວ່າ: ໂດຍທົ່ວໄປແລ້ວ ຄົນເຮົາອາດເບິ່ງບັນຫາໃນມູມມອງແຕກຕ່າງກັນ ຍ້ອນລະດັບການສຶກສາ,ຈິດສຳນຶກ ແລະ ອຸດົມຄະຕິແຕກຕ່າງກັນ ແຕ່ກໍ່ຍັງມີຄົນຈຳນວນໜຶ່ງທີ່ຂາດຄວາມຈະເລີນທາງດ້ານການສຶກສາ, ຂາດອະລິຍະທຳທາງດ້ານຈິດໃຈ ແລະ ມີອະຄະຕິຕໍ່ຄົນອື່ນ ມັກເບິ່ງບັນຫາ ແລະ ເຂົ້າໃຈບັນຫາໄປໃນທາງທີ່ເຊື່ອມເສຍໃຫ້ແກ່ຜູ້ອື່ນ. ຕົວຢ່າງຫນັງສືພິມບາງ ກອກພົດ (BangKok Post) ສະບັບວັນທີ 25  ທັນວາ 2006 ຂອງປະເທດໄທ ໄດ້ເຂົ້າໃຈຜົນປະໂຫຍດ ຂອງການນຳໃຊ້ຂົວຂ້າມແມ່ນຳ້ຂອງລະຫວ່າງສະຫວັນນະເຂດ ແລະ ມຸກດາຫານ ນັ້ນໄປໃນແງ່ລົບ ທີ່ຕຳ່ຕ້ອຍ, ຊຶ່ງບາງກອກພົດ ໄດ້ກ່າວວ່າ: ໂດຍອີງຕາມການລາຍງານ(ຈາກໃຜກໍ່ບໍ່ຮູ້) ວ່າກຸ່ມຍິງຂາຍບໍລິການແຂວງສະຫວັນນະເຂດຕ່າງກໍ່ຫວັງວ່າ ຈະມີແຂກມາໃຊ້ບໍລິການຫລາຍ ຂຶ້ນ, ຫລັງຂົວມິດຕະພາບ ລາວໄທ ແຫ່ງທີ 2 ເຊື່ອມຕໍ່ລະຫວ່າງແຂວງສະຫວັນນະເຂດມຸກດາຫານ ທີ່ຈະໄດ້ຮັບການເປີດໃຫ້ປະຊາຊົນທົ່ວໄປນຳໃຊ້ໃນເດືອນມັງກອນ 2007 (ພິທີເປີດໄດ້ຈັດ ວັນທີ 20 ທັນວາ 2006  ແລະ ຈະນຳໃຊ້ໃນເດືອນມັງກອນ 2007) ແລະ ກ່າວວ່າຍິງບໍລິການເຫລົ່ານັ້ນ ໄດ້ສະແດງຄວາມເຊື່ອຫມັ້ນວ່າ ຂົວແຫ່ງນີ້ຈະດຶງດູດນັກທ່ອງທ່ຽວຈາກທົ່ວໂລກ ເຂົ້າມາແຂວງ ທີ່ມີລາຕີສະໂມສອນຫລາຍເຖິງ 84 ແຫ່ງເປັນຕົ້ນ.ອັນນີ້ເຫັນວ່າ ຄວາມເຂົ້າໃຈໃນຜົນກະທົບ ຂອງຫນັງສືພິມບາງກອກພົດ ແມ່ນເຂົ້າໃຈແບບບໍ່ສ້າງສັນ ແບບຂາດຄວາມຮອບຄອບໃນການຕີລາຄາ ແລະ ເບິ່ງບັນຫາແບບລາມົກ ແບບຢຽບຢຳ່ກຽດສັກສີ ຂອງແມ່ຍິງ ທີ່ແຂວງ ສະຫວັນນະເຂດ ທີ່ສຸດ, ເປັນຫຍັງຫນັງສືພິມດັ່ງກ່າວບໍ່ຊອກຂໍ້ມູນນຳເຈົ້າຫນ້າທີ່ຝ່າຍລາວ ຫລື ຝ່າຍໄທ ທີ່ຮູ້ເລື່ອງຜົນປະໂຫຍດ ຂອງການນຳໃຊ້ຂົວດັ່ງກ່າວ, ບາງກອກພົດ ຮູ້ບໍ່ວ່າ ຜົນກະທົບອັນດີຄືວ່າຂົວດັ່ງກ່າວແມ່ນຂົວຍຸດທະສາດ ໃນການເຊື່ອມໂຍງການຄົມມະນາຄົມຂົນສົ່ງ, ເຊື່ອມໂຍງທາງດ້ານເສດຖະກິດຕາເວັນອອກ ແລະ ຕາເວັນຕົກ, ນຳເອົາຜົນປະໂຫຍດມະຫາສານມາໃຫ້ແກ່ ລາວໄທຫວຽດນາມ ແລະ ບັນດາປະເທດໃນພາກພື້ນ ແລະ ໃນໂລກ ນຳອີກ.

ຄັດຈາກຫນັງສືພິມປະຊາຊົນ